|| كـــذاب مـــن قــال المحبـه تسـاهيـل ||

لايومـــي بيـــــوم ٍ ولا ليلـــــي بليــــل
ولا السّعــــد مقبل ولا الهـــــم زايـــــل

ماغيـــر ازم همــــوم واحــــط واشيـــل
ولاراح منهــــا هـــــم جــالــــه بدايــــل

تدرون يالعربـــان وشهـــي البهــاذيـــل
فرقـى وليـــف وحـــظ مــامـن صمايـــل

الوصـــل نعمــــه والمفـــارق غـرابيــــل
يــاحـظ ليتــــك تـعتــــدل مــا تمــايـــل

لامـن بغيــت اعــــدّلك ترجـــع تميــــل
كنّـــك تقـــول اعيــش وامــوت مايــــل

والمهــرة اللي ماتعيّــن مــــع الخيـــل
من دونهـــا تقصــــر جميــــع الأصـايـل

من دونها ضــاعت عقــول الحلاحيـــل
وتضـــاربت فيهـا سلــــوم القبـــايــــل

ياشيب عيني يوم قفّـــت وانــا اخيـل
دمـــوعهــا وبلٍ علـى الخـــد ســـايـل

وانا اتصبّـــتر وازهــــم العقــل والحيـل
والقلب يشكـــي للضلـــوع النحــايـل

اصبـــر مثـل صبر الرجــال المشاكيـل
واخبّـــي جــــروح الزمــــن واتحـــايـل

لن الـردي والهيس وخبـل الرجــاجيل
تفــرح لا ورانـــي الزمـــتان الهـــوايـل

وانـا اتــــرفع واتــــرك القــــال والقيـــل
واجبر عــزى قلبٍ على المـــوت آيــل

أشــب نار الشـوق وارهي المعاميــل
واريّـــح اعصــابـي ببـــدع المثـــايــــل

ولاّ الغلا مــاعــــاد يحتــــاج تفصيــــل
لنّـه مـــورينـي نجـــــوم القـــــوايـــل

ياللي غيــابك حـــط بالقلـب تنكيـــل
ويلي على قربـــك ولانـي بطــــايـــل

لاغـاب صوتــك ماتفيـــد المــراسيــل
وفــر على الجــــوال كثــــر الرســايـل

والله لـــو تـــاخــذ لدمـــي تحـــاليـــل
تلقــــاك بالجينـــات صـــايـــل وجايـل

حبـك تعـــدى حـــب الاكــــراد لأربيــل
الاّ تعـــــدى حـــــب شمــــر لحــايـــل

صبيت حبـك مثــل صـــب الفنــاجيــل
وين الجليلـه تشـــرب اشــواق وايــل

وانتـه تواعدنـي من اسهيـل لسهيـل
والشــوق في قلبـي مسـوي عمايـل

ليتـــك تبــادلنــي الغـــلا والمــواصيـل
وتـرد لـي بعـــض الوفــــا والجمــايــــل

تعبـــت مــن قـــولة ظـــروف وعـراقيـل
وتعبــت مــن قولـــة ياقـــل الوســايـل

يعنـــي انــا ويـــاك مثــــل المهـــابيـل
واشــبـــاهنـــا فالوقــــت هـذا قــلايـل

كـــذاب مـــن قــال المحبـه تسـاهيـل
راحـــو ضحيتهــــا عيـــال الحمــــايــل


اتمنى من كل قلبي تعجبكم..